O Betanzos CF e o CDX Aranga formalizaron un convenio de filialidade co obxectivo de establecer unha colaboración estable que favoreza o desenvolvemento deportivo e formativo dos xogadores de ambas as entidades.

 Con este acordo, o CDX Aranga que actualmente milita en 3ª futgal actuará como club filial do Betanzos CF de Preferente futgal. O convenio permitirá a cesión de xogadores que acaban a etapa de xuvenís no Betanzos, así como a posibilidade dos xogadores menores de 23 anos de xogar en ambas as entidades, a cooperación técnica e deportiva, así como a organización de adestramentos conxuntos, formación de adestradores e actividades que fortalezan o tecido futbolístico da comarca.

Desde ambos os clubs celébrase esta alianza como “unha oportunidade de crecemento conxunto e de impulso ao talento local, reforzando a estrutura deportiva de base e promovendo valores como o traballo en equipo”.

Este acordo forma parte da estratexía de crecemento do noso fútbol base, aumentando o proceso de formación para os nosos xogadores que conclúen a etapa xuvenil e facendo posible que continúen ligados ao noso club mentres continúan a súa progresión.

“Este convenio representa un paso firme cara a un modelo colaborativo que beneficiará a xogadores con ganas de xogar ao fútbol e demostrar a súa valía en todas as categorías”, apuntaron ambos os presidentes.